يابنادم تمنيتك كتاب مرصع بجوهر
مفتوح لكل واحد ومدادو مَ الذهب
حروفو نقرة منقوشة ما تغير
اللي قراك يفهم وياخذ اللب
صفْحاتو ناعمة ملسة
تعجب الناظر وتشدو فَ الحين
وغلافو متين وسطورو واضحة
ما يقدر الواحد منو يحدر العين
يتمرر من يد لْ يد ومن جيل لْ جيل
يروي ليهم قصص حكيمة ودواير زمان
وتتعطا لو قيمة كبيرة لانو من صنع لجليل
خلقو من تراب مالو مثيل وحذرو مَ الشيطان
يابنادم كون ينبوع ماء صافي ما ينقطع
اللي قصدك يروي عطشو وما يشبع
رويه ولاتحاسبو وتقولو علاه
راه المثل يقول : دير الخير وانساه
الخير يثمر يثمر ف اولاد الناس
غير صبر وترجى الخير وما يطرا باس
مولانا العالي قادر وحنين
على كن فيكون وتغيير لقلوب ف رمشة عين
يابنادم كون عملة واحدة معدنها حر
اللي ملكك يشريك ما يبيعك
ولا تكون قصديرة بشْعة المنظر
اللي شاف فيك يسخط ويحط اللعنة عليك
يابنادم كون شمعة تْضوي على لعباد
تحرق بنارها وتنور مجمع الاجواد
اكتم انينك وانت ساهر الليالي
وشد عودك وخا تذوب لا تبالي
نورك ينبه غيرك من الظلام
ويوصلو لْ كنه الحقيقة ولو كانت ف الاحلام