دموع التراب

الارض ناحت وبكات
شحال دوات وحكات
نار كادية فَ عروقي
لهابة شاعلة فَ عروقي
من اقدام نتينة وطاتني
وناس خاينة خذلتني
ونفوس مشرارة اغتاصبتني
من يطفي ناري
يهدا مَ غْياري
كنادي ونوح
على كل عرق فيا مجروح
فين الشيوخ والجدود
اللي كتبهم التاريخ شهود
وقصاو العدو م الوجود
فين الشرفة وْ لَجواد
اللي كانو ماليين لَبلاد
تَنْقَشْ على جبينهم الهم
وسقاو الارض بالدم
كانو شجعان
بترو العديان
داسو بْ لَقدام على العصيان
سمعني التراب
توجع ودمى
ودرف دموع بْلا ما
سمعني السحاب
غَيم ولا ظلمة
لبس السواد فَ السما
سمعني الشجر
تقصم لو الجذر
ذبالت اوراقو وما بقى لونها اخضر
سمعني الصخر
ذاب وانصهر
قاوم وتقهر
سمعني الخيل
بحْ مَ الصهيل
كمل بْ العويل
سمعني بنادم
تازم وتالم
واش هو نادم على كل ما خْدم؟؟؟..